Almenn ánægja með Magasinkaup

Danir virðast almennt hafa brugðist vel við fregnum af kaupum Baugs og Straums fjárfestingarbanka á ráðandi hlut í hinni fornfrægu dönsku vöruhúsakeðju Magasin du Nord. Danskir fjölmiðlar hafa fjallað nokkuð um kaupin um helgina og eru flestir þeirrar skoðunar að fyrirtækið muni styrkjast við þau. Í Jyllandsposten í gær er rætt við trúnaðarmann starfsmanna í Árósaútibúi fyrirtækisins en þar vinna 340 manns. Enda þótt netmiðlar hafi birt fréttina á föstudaginn áður en starfsfólkinu var tjáð um eigendaskiptin kom hún sem þruma úr heiðskíru lofti fyrir starfsfólkið. "Við lítum öll mjög jákvæðum augum á þessi kaup og höfum miklar væntingar til framtíðarinnar," sagði trúnaðarmaðurinn, Grete Kirk, í samtali við blaðið í gær. Berlingske Tidende greindi einungis frá sjálfum kaupunum en lagði ekkert mat á þau. Vefútgáfa danska ríkisútvarpsins greindi hins vegar frá jákvæðum viðbrögðum stjórnarmanna fyrirtækisins, sem telja hina nýju eigendur vera með skýra sýn og burði til að reisa Magasin du Nord til sinnar fornu frægðar.