Kaupir á lægra verði

Samkvæmt fréttum í breskum fjölmiðlum í gær hefur náðst samkomulag milli Baugs og eigenda Big Food Group um hvernig fara eigi með miklar eftirlaunaskuldir samsteypunnar. Þetta mál hefur staðið endanlegum samningaviðræðum fyrir þrifum. Fréttablaðið hefur heimildir fyrir því að Baugur muni greiða lægra verð fyrir kaup sín í verslunarkeðjunni en áður var áætlað. Hingað til hefur verið talið að verð á hlutabréfum yrði í kringum 110 pens á hlut en nú er talið líklegra að það verði ríflega tuttugu prósentum lægra, í kringum nítíu pens á hlut. Nýjustu rekstrartölur frá Big Food Group sýna að sala hefur minnkað hjá Iceland-matvörukeðjunni og Booker-verslununum einnig. Nú stendur yfir áreiðanleikakönnun en gert er ráð fyrir að Baugur kaupi keðjuna að henni lokinni nema eitthvað fleira óvænt komi upp úr kafinu.