SH kaupir í Bretlandi

Sölumiðstöð hraðfrystihúsanna, SH, hefur keypt breskt félag, Cavaghan & Gray Seafood, sem framleiðir kældar sjávarafurðir fyrir breskar smásöluverslanir. Kaupverðið er 1,6 milljarðar króna. Með kaupunum eykst framleiðsla SH á kældum matvörum á breskum markaði til muna. "Þetta er þriðjungsaukning á okkar framleiðslu á þessum markaði," segir Gunnar Svavarsson, forstjóri SH. Gunnar segir fyrirtækið framleiða vörur sem smellpassi við framleiðslu SH. Cavaghan & Gray Seafood hefur selt vörur sínar að stærstum hluta til Marks & Spencer. Gunnar segir að Marks & Spencer sé næststærsti viðskiptavinur SH á Bretlandseyjum og kaupin séu með stuðningi Marks & Spencer. "Þetta er liður í vilja smásölukeðja til að fækka birgjum og vinna náið með þeim." Framleiðsluvörur breska fyrirtækisins eru brauðaður fiskur, lax, flatfiskur, bökur og þægindavörur tilbúnar til eldunar eða hitunar. Gunnar segir að vænst sé verulegrar hagræðingar af kaupunum. Kældar matvörur skila betri framlegð til fyrirtækja en frystar og hafa íslensk fyrirtæki beint sjónum sínum í auknum mæli að þeim markaði. Gunnar segir Bretland þróaðasta markaðinn á þessu sviði og því ekki að undra að SH leggi áherslu þann markað.