Samstaða á síðustu stundu

Allt fram til síðustu mínútu fyrir hluthafafund Íslandsbanka leit út fyrir að fylkingar tækjust á um kjör í bankaráð Íslandsbanka. Fylkingar náðu saman rétt áður en fundur hófst og dró einn fulltrúi hvorrar fylkingar framboð til baka og varð því sjálfkjörið í bankaráðið. Einar Sveinsson var endurkjörinn formaður bankaráðsins, en auk hans voru úr fylkingunni kjörin í bankaráðið Karl Wernersson, Jón Snorrason, Róbert Melax og Steinunn Jónsdóttir. Steinunn er fyrsta konan sem kjörin er aðalmaður í bankaráð Íslandsbanka. Þessi hópur hefur nú fulla stjórn á bankanum og fylkir sér að baki forstjóra bankans, Bjarna Ármannssonar. Hin fylkingin fékk tvo fulltrúa, þá Helga Magnússon og Úlfar Steindórsson. Úr bankaráðinu fóru Víglundur Þorsteinsson, Guðmundur B. Ólafsson og Orri Vigfússon, en Orri var kjörin varamaður í bankaráðið. Þessi fylking telur sig eiga meira inni, en Straumur gat ekki nýtt átta prósent af hlut sínum í bankanum vegna þess að ekki liggur fyrir heimild Fjármálaeftirlitsins til eignar meira en tíu prósenta hluts Straums í bankanum. Hin fylkingin mat stöðuna svo að lífeyrissjóðir ætluðu sér ekki að blanda sér í átök um stjórn bankans og því einsýnt að ekki væru atkvæði fyrir nema einum manni miðað við að Straumur gæti ekki beitt fullum atkvæðisrétti. Með þessari niðurstöðu er talið að friður verði um stjórn bankans um sinn. Hins vegar má búast við að aftur verði tekist á um stjórn bankans þegar og ef Fjármálaeftirlitið samþykkir hæfi Straums til að eiga virkan eignarhlut í bankanum. Bjarni Ármannsson, forstjóri bankans, fór yfir rekstur hans að undanförnu. "Það eru spennandi tímar fram undan hjá Íslandsbanka. Markviss vöxtur hefur skilað sér í traustum rekstri og mikilli arðsemi," sagði Bjarni við hluthafa bankans. Engin sundrung einkenndi hluthafa bankans á fundinum. Einróma var samþykkt heimild til stjórnar til hlutafjáraukningar sem bankinn hyggst nýta til frekari sóknar.