Kauptækifæri og hægur bati

 Fjárfestar og miðlarar á markaðnum fóru fremur lystarlitlir í hádegismat í gær. Úrvalsvísitala Kauphallarinnar hafði þá lækkað um tæp sjö prósent. Hlutabréf tóku að hækka á ný eftir hádegið, en eftir sem áður lækkaði úrvalsvísitalan tíunda daginn í röð. Lækkunin nam 2,71 prósenti og hefur vísitalan lækkað um 18,5 prósent frá því að hún náði hámarki 8. október. Síðustu dagar hafa verið erfiðir á markaði og raddir gerast nú háværari um að engin skynsemi sé í að markaðurinn lækki mikið í viðbót. "Við teljum að það séu ýmis góð fjárfestingartækifæri á markaðnum eftir þessar lækkanir," segir Sigurður Valtýsson hjá MP fjárfestingarbanka. Jafet Ólafsson tekur í sama streng. Hann segir verð nokkurra fyrirtækja sé komið niður fyrir greiningarvirði og stærri fjárfestar eins og lífeyrissjóðir hljóti að fara hugsa sér til hreyfings. "Ég met það þannig að það séu víða ágætis kauptækifæri á markaðnum." Félög eru afar mis viðkvæm fyrir lækkunum á markaði. Fjárfestingarfélög eru næm fyrir lækkunum á markaði og speglast lækkunin í gengi þeirra. Burðarás, Straumur og Landsbankinn eiga mikið af hlutabréfum og fór um marga á markaði þegar bankinn hafði lækkað um tæp tólf prósent í gærmorgun. Bankinn lauk deginum með 6,69 prósenta lækkun. Landsbankinn hefur verið í örum vexti og skiptar skoðanir á virði hans. Meðal miðlara á markaði telja margir að undirliggjandi rekstur bankans og væntanleg útrás standi vel undir virði hans á markaði. KB banki hefur lækkað mikið og kennitölur bankans sem fjárfestar nota við mat á fyrirtækjum komnar á svipað ról og hjá bönkum á Norðurlöndum sem ekki hafa verið í jafn miklum vexti og KB banki. "Maður spyr sig hvar þeir fjárfestar séu nú sem keyptu í bankanum á genginu 480. Af hverju kaupa þeir ekki nú þegar gengið er komið niður fyrir 450," segir Jafet. Miðlarar sem rætt var við benda einnig á að framleiðslufyrirtæki á markaði hafi verið að skila ágætis afkomu og vexti. Lækkanirnar nú hafi skapað kauptækifæri til lengri tíma. "Það er mjög erfitt að spá um framhaldið næstu daga," segir Jafet. "Menn héldu almennt að markaðurinn væri að róast á mánudag, en í gær var mikið líf í honum." Hann telur að mesti kúfurinn sé yfirstaðinn. Miðlarar bankanna telja að mesti söluþrýstingurinn hafi verið frá smærri og millistórum aðilum á markaðnum. Einnig hafi verið áberandi að verðbréfasjóðir hafi verið að selja úr söfnum sínum. Þar eru eigendur flestir smærri fjárfestar. Einn miðlari hafði á orði að litli maðurinn væri að selja í panikk, meðan stærri fjárfestar biðu rólegir og færu að koma inn á markaðinn þegar þeir sæju fyrir endann á lækkunarhrinunni. Sérfræðingar á markaði velta vöngum yfir því hvað hafi valdið þeim lækkunum sem verið hafa að undanförnu. Nokkrir bautasteinar þeirra leiðar eru nefndir. KB banki sótti sér yfir 90 milljarða í nýju hlutafé, auk þess sem forsvarsmenn bankans gáfu til kynna minni áhuga á kaupumá breska bankanum Singer and Friedlander. Þá hafi stór skuldabréfaútboð verið að undanförnu, auk þess sem nokkur fyrirtæki hafa boðað hlutafjárútboð. Framboð af fjárfestingarkostum hafi því aukist og það ýtt af stað lækkun. Síðan taki hjarðhegðun við. Hjörðin hlaupi saman niður að vatninu; líka þeir sem ekki eru þyrstir. Spurningin nú sé hvert þeir peningar sem innleystir hafa verið á markaðnum leiti og hvenær bros fái dimmu í dagsljós breytt. Flestir miðlarar og sérfræðingar sem rætt var við gera ráð fyrir að markaðurinn fari að rétta úr kútnum fljótlega. Það muni hins vegar taka hann nokkurn tíma að jafna sig á þessari leiðréttingu sem flestir áttu von á, en kom samt á óvart.