Stýrivextir hækka

Seðlabankinn tilkynnti í gær um hækkun stýrivaxta. Hækkunin tekur gildi um mánaðamót og verða stýrivextir bankans 7,25 prósent. Hækkunin í gær nam hálfu prósentustigi. Í tilkynningu frá Seðlabankanum segir að verðbólguvæntingar hafi þokast upp á við upp á síðkastið og því sé raunvaxtastigið ekki að hækka. Raunvextir eru vextir að frádreginni verðbólgu. Að sögn Birgis Ísleifs Gunnarssonar seðlabankastjóra er ákvörðunin tekin því Seðlabankinn telji að of mikil þensla sé í hagkerfinu. "Það er ansi mikil bólga í öllu. Það er gríðarleg ásókn í þessi fasteignaveðlán bankanna sem auðvitað ýtir undir þenslu, hvernig sem á það er litið. Þetta losar um fé og jafnvel þótt allt fari í endurfjármögnun þá er augljóst að það er verið að létta greiðslubyrðina," segir hann. Birgir Ísleifur telur að meira aðhald hafi þurft að vera í fjárlagafrumvarpi ríkisstjórnarinnar. "Við teljum að það sé verkefni sem Alþingi standi frammi fyrir í sambandi við endanlegan frágang fjárlaganna að það komi fram meira aðhald í endanlegum fjárlögum heldur en fjárlagafrumvarpið sýnir," segir Birgir Ísleifur.