OgVodafone eignast Norðurljós

Og Vodafone og Norðurljós verða sameinuð undir merkjum Og Vodafone en félagið hefur eignast 90 prósent í Norðurljósum. Innan Norðurljósa starfa ljósvakamiðlar Íslenska útvarpsfélagsins og dagblöð Fréttar, Fréttablaðið og DV. Gunnar Smári Egilsson verður framkvæmdastjóri Norðurljósa en Sigurður G. Guðjónsson, sem verið hefur framkvæmdastjóri Íslenska útvarpsfélagsins, hefur látið af störfum. Og Vodafone kaupir Norðurljós á 3,6 milljarða króna og hluthafar í Norðurljósum eignast hlut í Og Vodafone á móti. Með þessu móti eru fjölmiðlar Norðurljósa því komnir á hlutabréfamarkað. Eiríkur Jóhannesson, forstjóri Og Vodafone, segir að með kaupunum sé verið að tryggja báðum félögunum slagkraft í samkeppni. "Við sem fjarskiptafyrirtæki erum að tryggja okkur aðgang að mjög miklu og góðu efni til þess að veita áfram og ég vona að við séum að tryggja þessum miðlum gott aðgengi að fólki og skilvirkari dreifileiðir," segir hann. Fjölmiðlar Norðurljósa munu áfram starfa sem sjálfstæðar einingar og segir Eiríkur að sameiningin sé "fyrst og fremst sóknarsameining" þótt alltaf sé litið til þess að laga hluti til í rekstri þegar sameiningar verða. Skarphéðinn Berg Steinarsson, stjórnarformaður Norðurljósa og Og Vodafone, vonast til þess að halda megi hluthafafundi um miðjan nóvember þar sem endanlega verði gengið frá sameiningunni. Hann á ekki von á því að miklar breytingar verði á rekstri þeirra eininga sem starfa innan fyrirtækisins. "Bæði þessi fyrirtæki eru í nokkuð góðum rekstri í dag. Það eru hins vegar ýmis tækifæri sem liggja í því að þau starfi nánar saman og það verða einhverjar breytingar sem leiða af því," segir hann og bætir við: "Að stærstum hluta munu almennir starfsmenn ekki verða mikið varir við þessi kaup." Gunnar Smári Egilsson tekur í svipaðan streng. "Þrátt fyrir að yfirstjórn Fréttar og Íslenska útvarpsfélagsins hafi verið sameinuð þá munu fjölmiðlar í eigu fyrirtækjanna í raun fjarlægjast með sjálfstæðari ritstjórnum. Við munum hins vegar stilla saman markaðs- og sölustarf, fjármál og annan rekstur og sækja þangað aukið afl til að styrkja núverandi miðla annars vegar og hins vegar til að stofna til nýrra," segir Gunnar Smári. Skarphéðinn segir að þróun á þessum markaði sé í þá átt að fjarskiptafélög og fjölmiðlar starfi sífellt nánar saman og sameinist. Þetta hafi flýtt fyrir þessum viðskiptum. Sigurður G. Guðjónsson kveður Norðurljós og segir Skarphéðinn að framlag hans til félagsins hafi verið mikilsvert. "Sigurður kom inn í fyrirtækið á mjög erfiðum tíma. Hann vann mjög gott starf og á hans tíma í Norðurljósum var fyrirtækinu snúið úr því að vera gjaldþrota yfir í að vera í ágætum rekstri," segir hann.