Landsbankinn undir væntingum

Landsbankinn hagnaðist um 5,7 milljarða króna á þriðja ársfjórðungi og hefur hagnast um 11,7 milljarða það sem af er ári. Þetta er nokkuð minna en greiningardeildir hinna bankanna höfðu gert ráð fyrir. Rekstur bankans hefur stóraukist að umfangi á síðustu misserum. Tekjur bankans hafa tvöfaldast frá sama tíma í fyrra og heildareignir bankans hafa aukist úr 448 milljörðum í upphafi árs í 638 milljarða nú. Þetta er ríflega fjörtíu prósenta aukning. KB banki segir að afkoman sé "töluvert undir væntingum" en þar höfðu menn spáð ríflega sjö milljarða króna hagnaði á þriðja ársfjórðungi. Þar kemur þó fram að rekstrartekjur séu meiri en gert hafi verið ráð fyrir. Það bendir til þess að regluleg starfsemi bankans sé í sókn. Í frétt frá bankanum segir Sigurjón Þ. Árnason bankastjóri að vel hafi tekist að draga úr áhættu bankans vegna útlána. Haft er eftir Halldóri J. Kristjánssyni að erlend útlán bankans hafi aukist mjög. Fyrir um tveimur árum voru um tíu prósent útlána bankans til útlanda en nú ríflega fjórðungur.