Fjármálastarfsemin heim

Hagnaður Bakkavarar fyrstu níu mánuði ársins nam 1.470 milljónum króna. Hagnaður þriðja ársfjórðungs af reglulegri starfsemi nam 432 milljónum króna sem er 66 prósenta aukning. Afkoma Bakkavarar er í samræmi við væntingar stjórnenda félagsins, en örlitlu lægri en greiningardeildir bankanna gerðu ráð fyrir. Lýður Guðmundsson, forstjóri Bakkavarar, segir frávikið einkum skýrast af útreikningum hlutdeildarhagnaðar af eignarhlut Bakkavarar í Geest. Bakkvör hyggst flytja fjármálaskrifstofu sína til Íslands og mun hún verða til húsa í nýjum höfuðstöðvum félagsins við Tjarnargötu í Reykjavík. Bakkavör hefur tekið ákvörðun um að hefja starfsemi í Asíu. "Við gerum ráð fyrir að byggja þá starfsemi hratt upp og lítum á þetta sem meiriháttar ákvörðun fyrir fyrirtækið," segir Lýður. Bakkavör hyggst einnig reisa nýja verksmiðju í London sem leysa á óhagkvæmari verksmiðju af hólmi.