Flugleiðum hrósað fyrir dirfsku

Greiningardeild fjármálarisans J.P. Morgan hælir Flugleiðum fyrir kaup á hlut í breska lággjaldaflugfélaginu easyJet. Flugleiðir hafa eignast yfir tíu prósent í breska félaginu. "Við hyllum stjórnendur Flugleiða fyrir að taka skýra afstöðu til hlutabréfa sem við teljum undirverðlögð á markaði," segir sérfræðingur J.P. Morgan í greiningarskýrslu í kjölfar kaupa Flugleiða í easyJet. Hann segir aðdáunarvert að stjórnendur Flugleiða sýni þann kjark að synda á móti straumnum og kaupa hlut í easyJet Sérfræðingur J.P. Morgan telur yfirtöku Flugleiða á easyJet ekki í spilunum. Til þess sé hlutur Stelios-fjölskyldunnar of stór og litlar líkur á að því hún vilji selja sig út úr félaginu. Sérfræðingur J.P. Morgan telur Flugleiðir ekki sjá samlegðaráhrif milli easyJet og Flugleiða, til þess sé viðskiptamódel félaganna of ólíkt. Niðurstaðan hljóti því að vera að Flugleiðir hafi séð langtímatækifæri á vanmati markaðarins á verðmæti easyJet. Sérfræðingur J.P. Morgan segir Flugleiðir væntanlega hafa komið auga á að í langtímasamningi easyJet við flugvélaframleiðendurna Airbus liggi veruleg dulin eign. Þrátt fyrir að Airbus A319 taki færri í sæti en vélar samkeppnisaðilans Ryanair, þá sé kostnaður á sæti lægri hjá easyJet. Við þetta bætist svo að easyJet gerði stóran kaupsamning við Airbus-verksmiðjunnar á hagstæðum kjörum vegna mikillar samkeppni Airbus og Boeing þegar eftirspurn dróst saman. Greiningardeild J.P. Morgan segir því endusöluverð vélanna í dag hærra en kaupsamningurinn hljóðar upp á. Flugleiðir þekkja vel til þessa þáttar flugrekstrar, enda hefur félagið hagnast á að selja notaðar vélar. Mat J.P Morgan er að Flugleiðir hafi einfaldlega greint þá duldu eign sem liggi í easyJet og hyggist hagnast þegar markaðurinn í heild geri sér grein fyrir þeim verðmætum sem liggi í félaginu.