Landsbankinn efstur

Landsbanki Íslands hefur rutt KB banka úr efsta sæti á lista yfir þær fjármálastofnanir sem hafa milligöngu um mest viðskipti í Kauphöll Íslands. Í fyrra var Landsbankinn í þriðja sæti á eftir KB banka og Íslandsbanka. Á fyrstu þremur ársfjórðungunum í ár hefur Landsbankinn staðið fyrir 35 prósentum allra viðskipta í Kauphöllinni, KB banki 32 prósentum, Íslandsbanki 17 prósentum og Straumur 7 prósentum. Í frétt frá Landsbankanum segir Sigurjón Þ. Árnason bankastjóri að þetta sé í takt við annað hjá bankanum undanfarið og sýni það traust sem Landsbankinn hafi áunnið sér hjá viðskiptavinum. "Við höfum lagt áherslu á þennan hluta starfsemi okkar og erum stolt af árangrinum," segir Sigurjón.