Mesta lækkun á tveimur dögum

Síðustu dagar hafa verið nokkuð átakamiklir í Kauphöll Íslands. Úrvalsvísitalan hefur nú lækkað um 7,08 prósent á tveimur dögum. Aldrei fyrr hefur lækkunin verið jafnmikil á tveimur dögum. Á mánudag lækkaði Úrvalsvísitalan um fleiri stig en nokkru sinni fyrr og hlutfallslega var lækkunin hin ellefta mesta frá upphafi. Stigametið var slegið í gær þegar vísitalan féll um 156,99 stig og hlutfallslega er lækkunin hin fimmta mesta í prósentum talið frá því að vísitalan var reiknuð fyrst árið 1993 og hin næstmesta síðan 1994. Mjög mikil viðskipti voru í Kauphöllinni í gær. Hlutabréf skiptu um hendur fyrir ríflega tíu milljarða króna í 2.087 viðskiptum. Fjöldi viðskipta bendir mjög til þess að smærri fjárfestar hafi verið að selja bréf fyrir litlar upphæðir í gær. Fjöldi viðskipta í gær er hinn níundi mesti í sögu Kauphallarinnar og hinn mesti síðan 30. desember 2002. Viðskipti í Kauphöllinni hafa verið flest á síðustu dögum hvers árs þegar skattaafsláttur vegna hlutabréfakaupa var í gildi. Dagurinn í gær sker sig úr að þessu leyti því ekkert var óvenjulegt við daginn annað en að greinilegur söluþrýstingur var á hlutabréfum í nánast öllum félögum. Mest voru viðskipti með bréf í KB banka og Landsbanka. Líklegt er að margir vilji innleysa mikinn hagnað af eign í þessum tveimur félögum. Auk þess hafa fregnir um hik KB banka varðandi Singer & Friedlander dregið úr væntingum um ytri vöxt. Landsbankinn lækkaði um 6,6 prósent í gær en bankinn hefur hækkað mjög hratt á síðustu mánuðum auk þess sem rekstur bankans er viðkvæmur fyrir sveiflum á markaði því Landsbankinn á miklar eignir í hlutabréfum. Atli B. Guðmundsson, hjá greiningardeild Íslandsbanka, segir lækkun síðustu daga ekki koma á óvart. "Í ljósi þess hve hækkarnirnar voru orðnar miklar og að viðskiptin voru farin að einkennast meira af spákaupmennsku en rekstri fyrirtækjanna þá hlaut að koma að þessu," segir hann. Um það hvort líklegt sé að þessi þróun á markaði haldi áfram segir Atli að erfitt sé að segja til um það. "Það eru sterk rök fyrir því að úr því að þessi þróun er hafin þá sé sennilegt að það muni reyna á meiri lækkanir. Hins vegar eru uppgjörin að berast og fullt af fréttum sem geta hreyft markaðinn líka og þá jafnvel í hina áttina," segir Atli.