Tíu milljarðar í hagnað

Íslandsbanki græddi tíu milljarða króna á fyrstu níu mánuðum ársins. Hagnaður þriðja ársfjórðungs var 3,3 milljarðar króna og í samræmi við spár greiningardeilda. Bjarni Ármannsson segir niðurstöðuna blöndu af hagstæðum ytri skilyrðum og góðum rekstri. "Kröftugur vöxtur hefur verið í efnahag bankans og góður hagnaður af reglulegri starfsemi fyrstu níu mánuðina. Útlit er fyrir að 2004 verði enn eitt metárið hjá Íslandsbanka." Hann segir bankann stefna að frekari erlendum vexti. Norska fjármálaeftirlitið hefur samþykkt yfirtöku Íslandsbanka á Kreditbanken. Eignir bankans jukust um 44 milljarða á síðasta ársfjórðungi og munar mestu um 30 milljarða útlánaaukningu. Gengishagnaður skýrir töluverðan hluta hagnaðar bankans. Bankinn hefur hins vegar selt og innleyst hagnað af hlutabréfum, meðal annars með sölu á hlut í Straumi fjárfestingarbanka. Áhætta bankans af sveiflum á hlutabréfamarkaði er því minni en hún var í upphafi árs.