Breytingar hjá Íslandsbanka

Íslandsbanki hefur gert skipulagsbreytingar til að styðja vöxt í alþjóðlegri starfsemi bankans. Fjárfestinga- og alþjóðasviði bankans hefur verið skipt í fjögur svið og lúta þau yfirstjórn Bjarna Ármannssonar forstjóra. Þá hefur verið myndaður sérstakur starfshópur um aukin umsvif Íslandsbanka í sjávarútvegi á alþjóðlegum vettvangi. Kristján Óskarsson, framkvæmdastjóri Glitnis, sem heyrir undir Íslandsbanka, mun taka við stjórn fyrirtækjasviði bankans. Í gær var einnig tilkynnt um starfslok Huldu Styrmisdóttur sem gegnt hefur framkvæmdastjórastöðu hjá Íslandsbanka um árabil. Íslandsbanki hyggur á hlutafjáraukningu á næstunni og má reikna með að nýtt fé verði notað til frekari útrásar bankans. Í Kauphöll Íslands í gær fór verðmæti Íslandsbanka upp fyrir verðmæti Landsbankans á ný. Báðir bankar lækkuðu í verði í gær en Landsbankinn meira en Íslandsbanki. Nú er Íslandsbanki metinn á 118,32 milljarða en Landsbankinn á 118,26 milljarða. Munurinn er aðeins sextíu milljónir króna sem er minna en einn þúsundasti af verðmæti Íslandsbanka.