Atvinnuleysi óbreytt

Atvinnuleysi er 2,6 prósent samkvæmt nýjustu tölum hjá Hagstofu Ísland. Atvinnulausir voru að meðaltali 4.300 á þriðja ársfjórðungi í ár sem er svipað og í fyrra þegar 4.400 voru atvinnulausir. Hins vegar hefur dregið nokkuð úr atvinnuþátttöku. Í fyrra voru 84,3 prósent Íslendinga á aldrinum sextán til 74 ára á vinnumarkaði en þeim hefur fækkað og eru nú 81,5 prósent. Atvinnuþátttaka er þó enn sem fyrr miklum mun hærri hér á landi en í öðrum löndum Evrópu. Greiningardeild Íslandsbanka sagði í Morgunkorni í gær að tölurnar bentu til þess að enn væri slaki á vinnumarkaði þrátt fyrir mikinn hagvöxt. Nærtækustu skýringarnar að mati Íslandsbanka er aukin þátttaka útlendinga í atvinnulífinu og aukin framleiðni, þ.e. vinnandi fólk framleiðir meira á hverja unna stund.