Nemendur fá aðgang að Kauphöllinni

Nemendur Háskólans í Reykjavík fá ókeypis aðgang að upplýsingum í á netinu af íslenskum fjármálamarkaði frá Kauphöll Íslands. Samningur þessa efnis var undirrituður fyrir skömmu og nær hann til um 150 nemenda. Auk þess að geta fylgst með viðskiptum, tilboðum og fréttum geta nemendur skoðað og greint söguleg gögn, skoðað ársreikninga og kennitölur félaga, gert ýmiss konar samanburð á fjárfestingarkostum og margt fleira. „Það er frábært tækifæri fyrir nemendur okkar að geta haft sömu sýn á íslenskan fjármálamarkað og verðbréfamiðlarar og aðrir fagmenn hafa," segir Þórdís Sigurðardóttir, forstöðumaður MBA náms við HR. „Þar að auki styrkir þetta samkeppnisstöðu Háskólans í Reykjavík enn frekar." Þórður Friðjónsson, forstjóri Kauphallarinnar, tekur í sama streng og segir það koma sér vel að nemendur, sem margir hverjir komi til með að starfa við fjármálamarkaði, fái þetta tækifæri til að kynnast þeim upplýsingakerfum sem notuð eru. Hann segir því sjálfsagt að fella niður gjöld til þess að veita nemendum aðgang.