Stefna að stækkun

Íslandsbanki hyggur á hlutafjáraukningu og hyggst stjórnin fá samþykki fyrir því á hluthafafundi að gefa út nýtt hlutafé að nafnvirði þrír millljarðar króna. Markaðsverðmæti slíkrar aukningar er um þrjátíu og fimm milljarðar ef miðað er við gengi á bréfum í félaginu í gær. Hlutaféð jafngildir tæplega þrjátíu prósent af bankanum. Einar Sveinsson stjórnarformaður Íslandsbanka vill ekki tjá sig um hvenær slík heimild yrði nýtt eða í hvaða verkefni. Hann segir að leitast sé við að styrkja bankann til verkefna bæði innanlands og í útlöndum. "Þetta er fyrirtæki sem er að stækka," segir hann. KB lauk í síðustu viku við stórt hlutafjárútboð í annað sinn á þessu ári. Alls hefur KB banki fengið nálægt hundrað milljörðum króna inn í reksturinn í gegnum þessi útboð og hefur í bæði skipti verið umtalsverð umframspurn eftir bréfum. Þetta bendir til að góður jarðvegur sé fyrir slíkum aðgerðum hjá bönkunum um þessar mundir.