Kögun kaupir Opin kerfi

Kögun hefur eignast ríflega tvo þriðju í Opnum kerfum og keypt út Frosta Bergsson, stofnanda og stjórnarformann félagsins. Átök hafa verið um eignarhald á félaginu undanfarna mánuði eftir að Kögun keypti 35,77 prósent í félaginu um miðjan ágúst. Frosti Bergsson kveðst sáttur við þessi viðskipti og segir hluthafa í Opnum kerfum fá gott verð fyrir hluti sína. "Þetta sýnir að menn eru skotnir í félaginu. Staðan á markaðnum í dag er þannig að félögum í Kauphöllinni er að fækka og félögin sem eru skráð eru háð breytingum og sviptingum," segir Frosti. Hann mun hætta sem starfandi stjórnarformaður Opinna kerfa en útilokar ekki að hann muni áfram starfa í upplýsingatæknigeiranum. Hvað varðar framtíð Opinna kerfa telur Frosti að þar vegi þyngst að hjá félaginu starfi góður hópur fólks. "Markaðsverðmæti félagsins er á níunda milljarð króna. Ég held að menn muni reyna mjög að passa upp á verðmætið sem er í félaginu og það er að stórum hluta fólkið sem þar starfar," segir hann. Viðskiptin í gær fóru fram á genginu 26,8 sem er um fimm prósentum hærra en lokagengi bréfanna var á fimmtudag. Ásamt Frosta seldi Straumur rúm fimm prósent, Íslandsbanki tæp tuttugu prósent.