SPK í sameiningarhug

Fulltrúar frá Sparisjóði Kópavogs (SPK) hafa rætt óformlega við fulltrúa frá Sparisjóði Reykjavíkur og nágrennis (SPRON) og Sparisjóðs vélstjóra (SPV) um þátttöku SPK í sameiningu sparisjóða á höfuðborgarsvæðinu. Þegar hefur verið tilkynnt um samrunaviðræður SPV og SPRON. Birgir Ómar Haraldsson, stjórnarformaður SPK, staðfestir að þetta hafi verið rætt en stjórn sparisjóðsins hefur gefið út yfirlýsingu þar sem fram kemur að stjórn SPK sé jákvæð í garð aukins samstarfs sparisjóðanna eða samruna þeirra. "Við skynjum það þannig að menn ætli að vera mjög samstíga um þessi mál og við fögnum því," segir Birgir Ómar. Hann segir að sparisjóðakerfið þurfi að þróast og telur viðræður um sameiningu SPV og SPRON vera merkilega tilraun til að koma slíkri framþróun af stað. "Það er merkilegt og ánægjulegt sem þarna á sér stað," segir hann. Hann segist vona að sem flestir sparisjóðanna taki þátt í þeim breytingum sem kunni að vera fram undan varðandi rekstrarumhverfi þeirra.