Fá 1,7 milljarða styrk

Íslensk erfðagreining hefur hlotið 24 milljóna dala styrk frá Bandarísku heilbrigðisstofnuninni til rannsókna á erfðafræði smitsjúkdóma. Samningur um rannsóknirnar gildir í fimm ár. Upphæðin jafngildir um 1.700 milljónir króna. Rannsóknirnar sem um ræðir eru á sviði smitsjúkdóma og arfgengum áhættuþáttum varðandi þá. Íslensk erfðagreining vinnur í samstarfi við háskólann í Nýju-Mexíkó og var samstarfið kynnt á blaðamannafundi í Santa Fe í gær. Í samtali við Fréttablaðið að loknum blaðamannafundi lýsti Bill Richardson, fylkisstjóri í Nýju-Mexíkó og fyrrum orkumálaráðherra Bandaríkjanna, ánægju með samninginn. "Þetta sýnir mikilvægi erfðarannsókna og ég er mjög ánægður að Nýja-Mexíkó hafi nú hafið samstarf við Íslendinga. Ég vona að það verði ekki aðeins langvinnt heldur fari vaxandi eftir því sem á líður." Í fréttatilkynningu frá Íslenskri erfðagreiningu segir að verkefnið felist í að leita að erfðavísum sem tengjast ónæmi fyrir berklum, aukaverkunum af völdum bólusetningar gegn bólusótt og næmi fyrir inflúensu og ýmsum bakteríusýkingum sem meðal annars valda lungnabólgu og heilahimnubólgu.