Æfir vegna yfirtöku

Stuðningsmenn knattspyrnuliðsins Manchester United eru margir hverjir æfir vegna hugsanlegrar yfirtöku bandaríska athafnamannsins Malcolm Glazer á félaginu. Manchester United er efnaðasta knattspyrnufélag í heimi og jafnframt eitt þekktasta vörumerki heims. Glazer á nú rúmlega 19 prósenta hlut í félaginu, en United er metið á tæpar 700 milljónir sterlingspunda, eða um 90 milljarða íslenskra króna og er nánast skuldlaust. Talið er líklegt að ef af kaupunum verður muni Glazer kaupa hlutinn á 2,70 til 3 sterlingspund, en í gær var hluturinn skráður á 2,66 sterlingspund. Manchester United er skráð fyrirtæki í kauphöllinni í London. Stofnað hefur verið félag áhangenda gegn sölu United, MEC, sem hefur hótað að efna til borgarastyrjaldar verði af viðskiptunum. Fjörutíu liðsmenn MEC ruddust inn á völlinn í leik United og Birmingham City í fyrrakvöld klæddir lambúshettum og héldu uppi borða sem á var letrað: "Ekki til sölu". Þeir eru taldir bera ábyrgð á því að rauðri málningu var skvett á bíl eins stjórnarmanna United á mánudag, en hann hafði selt Glazer milljón hlutabréf í félaginu nýverið. Miklar vangaveltur hafa verið um kaupin í breskum fjölmiðlum undanfarna daga en það fékkst ekki staðfest fyrr en í gær að í gangi væru viðræður milli Glazer og stærstu hluthafa í United, þar á meðal tveggja Íra, Magnier og McManus, sem eiga 28,9 prósenta hlut. Talsmaður Glazer sagði í viðtali við Fréttablaðið að líklegt væri að viðræðurnar stæðu yfir í allt að tvær vikur í viðbót. "Lykillinn að því að kaupin gangi í gegn er sá að Glazer vinni traust aðdáenda United. Ef Glazer mun koma með tilboð verður tryggt að áhangendur sjái sér hag í því til langsframa. Eitt af því sem Glazer ætlar sér að gera, verði af yfirtökunni, er að styrkja bönd félagsins við áhangendur," sagði talsmaðurinn. Að sögn talsmannsins eiga aðdáendur félagsins 18 prósent hlutabréfa. "Það er fólk sem mætir á hvern einasta leik liðsins. Það verður að trúa því að liðið muni styrkjast við yfirtöku Glazers," sagði hann. Stuðningsmenn liðsins hafa lýst yfir óánægju sinni með fyrirætlan Glazers og telja hann ekki nægilega sterkan fjárhagslegan bakhjarl fyrir félagið. Ólíkt eiganda Chelsea, Roman Abramovich, muni Glazer ekki hafa efni á því að dæla fjármunum til uppbyggingar liðsins, heldur séu markmið hans einungis að hagnast á kaupunum.