Tekur við sem forstjóri í TM

Óskar Magnússon hefur verið ráðinn forstjóri Tryggingamiðstöðvarinnar. Hann tekur við starfinu 15. nóvember af Gunnari Felixsyni sem gegnt hefur starfinu frá 1991. "Það er ánægjulegt að fá þetta tækifæri. Þetta er afar traust og gott fyrirtæki sem hefur verið í góðum höndum og þess vegna er það töluvert mikil áskorun að halda áfram því góða starfi sem þar hefur verið unnið," segir Óskar Magnússon. Hann segir þennan vettvang vera af öðrum toga en hann hafi áður fengist við. Óskar lét af störfum sem forstjóri Og Vodafone nú um mánaðamótin en hann hafði stýrt uppbygginu þess eftir sameiningu Tals og Íslandssíma. "Öll viðskipti eru frekar lík þegar upp er staðið," segir hann. Á það hefur verið bent að þetta sé í þriðja sinn sem Óskar skiptir um starfsvettvang eftir að Jón Ásgeir Jóhannesson og fyrirtæki honum tengd hafi komið að eignarhaldi á félögum þar sem Óskar hefur starfað. Óskar segir þetta vera spaugilega tilviljun en samskipti þeirra Jóns Ásgeirs hafi verið með miklum ágætum. "Þessi fyrirtæki eru öll keypt fyrir metfé þannig að ég hlýt að vera ánægður með það," segir Óskar.