Hagnaður hátt í 70 milljarðar

Hagnaður skráðra fjármálafyrirtækja stefnir í að verða á sjöunda tug milljarða á þessu ár samkvæmt afkomuspá Greiningar Íslandsbanka. Mestur verður hagnaðurinn hjá Landsbankanum eða tæpir sautján milljarðar. Ef spá um hagnað KB banka er lögð saman við hagnað samkvæmt rekstraráætlun danska bankann FIH verður hagnaðurinn hærri eða á nítjánda milljarð króna. Greining Íslandsbanka spáir ekki um hagnað Íslandsbanka. Hagnaður bankans var 10.6 milljarðar króna fyrir skatta fyrstu átta mánuði ársins. Ekki er óvarlegt að gera ráð fyrir um tólf milljarða hagnaði af rekstri bankans Að þessu gefnu má búast við að hagnaður skráðra fjármálafyrirtækja verði rúmir 65 milljarðar króna á þessu ári. Miklar hækkanir hafa verið á hlutabréfum fjármálafyrirtækjanna og einkennist hagnaður þeirra af gengishagnaði vegna gagnkvæmra eignatengsla á tímabilinu. Þannig birtist innleystur gengishagnaður Íslandsbanka af eign í Straumi í uppgjöri bankans. Gengishagnaður eigna Burðaráss bæði innleystur og óinnleystur skilar 13,5 milljarða hagnaði í ár. Sá hagnaður og bjartsýni um framhaldið endurspeglast í gengi Burðaráss sem aftur kemur fram í afkomutölum Landsbankans. Greining Íslandsbanka segir væntingar á markaðnum um breytingar á landslagi fjármálamarkaðar. Það endurspeglist í markaðsverðmæti fjármálafyrirtækjanna. Auk þessa eru miklar væntingar til útrásar fyrirtækjanna. Greining Íslandsbanka gerir ráð fyrir áframhaldandi bjartsýni á markaðnum um sinn. Helstu ógnanir við núverandi bjartsýni að mati Íslandsbanka er ef umbreytingar á fjármálamarkaði láta á sér standa. Þá gætu slæm tíðindi af útrásarverkefnum haft neikvæð áhrif á markaðinn. Greiningardeildin telur ólíklegt í bjartsýninni sem ríkri að slök uppgjör vegna núverandi reksturs fyrirtækja breyti viðhorfum fjárfesta.