Innflutningur á bílum eykst

Ríflega 30 prósenta aukning varð á innflutningi á fólksbílum í janúar til ágúst, sé miðað við sama tímabil árið 2003. Þetta kemur fram í nýjum tölum frá Hagstofu Íslands. Íslendingar fluttu inn fólksbíla fyrir 8,3 milljarða á umræddu tímabili í fyrra, en fluttu nú inn bíla fyrir 10,86 milljarða. Er þá átt við bæði minni bíla og jeppa. Veruleg aukning, eða um 55 prósent, hefur einnig orðið á innflutningi annarra flutningatækja til einkanota. Andvirði þess innflutnings var 461 milljón í fyrra en 717 milljónir nú. Aukning á innflutningi flutningatækja til atvinnurekstrar hefur einnig vaxið úr 3,7 milljörðum í 4,7 milljarða, eða um ríflega 28 prósent á föstu gengi. Alls hefur innflutningur á öllum flutningatækjum, þar með talið á skipum og flugvélum, aukist um 35 prósent. Innflutningur á skipum hefur þó raunar dregist saman. Eins og komið hefur fram í fréttum er vöruskiptahallinn við útlönd all nokkur um þessar mundir. Innflutningur alls nam 156,5 milljörðum á umræddu tímbili, en útflutningur nam alls 129,5 milljörðum. Hlutfallslega mesta aukningin í innflutningi einstakra vöruteguna virðist hafa verið í eldsneyti og smurolíum, en innflutningur á því hefur aukist um 44 prósent miðað við fast gengi. Alls námu kaupin á eldsneyti og smurolíum um 14,5 milljörðum króna.