Bakdyramegin inn í Íslandsbanka?

Fjárfestingarbankinn Straumur hefur eignast um fjórtán og hálfs prósents hlut í Íslandsbanka eftir að bréf Burðaráss, Landsbankans og bréf sem voru á nafni Helga Magnússonar runnu inn í Straum í miklum umskiptum á markaði í gærkvöld. Sérfræðingar á markaði ræða þann möguleika að með þessu séu Landsbankamenn að fara bakdyramegin inn í Íslandsbanka. Straumur er þar með stærsti einstaki hluthafinn í Íslandsbanka og greiddi hann fyrir bréfin með hlutabréfum i sjálfum sér og reiðufé. Við það eignaðist Landsbankinn og Burðarás, sem er að langmestum hluta í eigu sömu aðila, fjórðungs hlut í Straumi og teljast því kjölfestufjárfestar í Straumi. Talsmenn þessarra viðskipta segja þetta lið í enn frekari uppstokkun á íslenskum fjármálamarkaði en eins og fram hefur komið hafa Landsbanakmenn sýnt áhuga á að sameinast Íslandsbanka, án þess að þetta sé sagður liður í því, að þeirra sögn. Hlutabréf í Straumi hafa hækkað mikið á markaði í morgun, svo og gengi bréfa Burðaráss, Landsbankans og Íslandsbanka. Myndin er af Þórði Má Jóhannessyni, forstjóra Straums.