Meiri bjartsýni

Bjartsýni neytenda um horfur í efnahagslífinu eykst enn. Væntingavísitala Gallup hækkaði um níu stig á milli mánaða og hefur tekið snöggan kipp upp á við á síðustu mánuðum. Í Morgunkorni Íslandsbanka kemur fram að fólk sé bjartsýnna um almennar efnahagshorfur auk þess sem fleiri hyggja á fasteigna- og bílakaup. Í vor tók væntingavísitalan dýfu þegar "svartsýniskast" greip um sig meðal neytenda að mati greiningardeildar KB banka. KB banki gerir þó fyrirvara við túlkun vísitölunnar og segir að vísitalan hafi verið því marki brennd að sveiflast mikið. Væntingavísitalan er nú 12,3 stigum hærri en hún var fyrir einu ári. Nú stendur vísitalan í 119,3 stigum og hefur aðeins tvisvar farið hærra síðan mælingar hófust árið 2001. Þetta þýðir að fólk telur almennt að ástand efnahagsmála sé gott. Langtímavæntingar eru hins vegar áþekkar því sem þær voru á sama tíma í fyrra. Bjartsýni um efnahagshorfur eftir hálft ár er örlítið minni en hún var þá. Í Bandaríkjunum ríkir hins vegar þveröfug stemmning. Þar lækkaði sú vísitala sem mælir trú neytenda á efnahagshorfum. Þetta er annar mánuðurinn í röð sem þessi vísitala lækkar. Þar er talið að hægagangur í atvinnumálum dragi úr væntingum fólks.