Baugur og Samherji með Björgólfi

Burðarás, fjárfestingarfélag undir stjórn Björgólfsfeðga og Kaldbakur sem er undir stjórn Baugs og Samherja munu sameinast. Gengið var frá samningum þess efnist síðdegis í gær. KEA sem var stór hluthafi í Kaldbaki seldi sig út og fjárfesti í staðinn beint í Samherja. Með viðskiptunum eru Björgólfsfeðgar komnir í samstarf við Jón Ásgeir Jóhannesson og Þorstein Má Baldvinsson í fjárfestingarfélagi með um 40 milljarða í eigið fé og markaðsvirði upp á 80 milljarða. Kaldbakur er upprunalega afsprengi KEA. Andri Teitsson forstjóri KEA hefur lýst því yfir að félagið hyggist beita sér fyrir arðsömum fjárfestingum á Norðurlandi Eystra. Fjárfestingar Kaldbaks hafa ekki markast af landfræðilegri stöðu. "Kaldbakur var ekki mikið að hjálpa okkur í verkefnum okkar hér, þannig að við töldum meira virði að tengjast Samherja og mynda sterkan eigendahóp þar." KEA fékk 3,7 milljarða fyrir bréf sín í Kaldbaki og fjárfesti í Samherja fyrir rúma tvo milljarða. KEA innleysir 2,5 milljarða hagnað af viðskiptunum. Jón Ásgeir Jóhannesson, forstjóri Baugs segir nauðsynlegt að fjárfestingarfélög af þessu tagi hafi afl til að takast á við stór verkefni. Samanlagt séu félögin fjárhagslega sterk og geti tekist á við stór erlend verkefni. Friðrik Jóhannsson, framkvæmdastjóri Burðaráss segir að eftir sameiningu hafi Burðarás afl til að takast á við stærri verkefni. Hann segir umræðu um sameiningu hafa komið upp. "Þetta gerðist hins vegar mjög hratt." Stefna Burðaráss er að þrír fjórðu fjárfestingar séu erlendis. Forystumenn hluthafahópsins hafa allir mikil tengs á erlendum vettvangi. Friðrik segir að þótt stefna Burðaráss sé að fjárfesta í fjarskiptum og fjármálstarfsemi komi einnig til greina að taka þátt í verkefnum tengd smásölu, en Baugur hefur látið til sín taka á þeim vettvangi í Bretlandi.