Augnbotnamælitæki verðlaunað

Þrír fræðimenn í Háskóla Íslands, hver á sínu sviði, hlutu í gær verðlaun fyrir sameiginlegt verkefni sem miðar að því að útbúa tæki sem greint getur ýmsa augnsjúkdóma án þess að nemar séu settir inn í augað. Einar Stefánsson, prófessor í læknadeild, Jón Atli Benediktsson verkfræðiprófessor og Þór Eysteinsson, dósent í lífeðlisfræði, standa að verkefninu, sem felst í að þróa tækjabúnað sem metur blóðþurrkarsjúkdóm í augnbotnum. Í öðru sæti í hugmyndasamkeppninni "Upp úr skúffunum" var verkefni á sviði félagsfræði undir stjórn Kristínar Loftsdóttur dósents. Jóhann P. Malmquist, prófessor í tölvunarfræði, og Guðlaugur Kr. Jörundsson meistaranemi fengu þriðju verðlaun fyrir verkefni um sjónræna framsetningu á umræðum í vefkerfi.