Vaxtahækkun vestra

Bandaríski Seðlabankinn hækkaði stýrivexti um fjórðung úr prósentustigi í gær. Stýrivextir í Bandaríkjunum hafa verið hækkaðir þrisvar í ár en eru þó enn mjög lágir í sögulegum samanburði. Þeir standa nú í 1,75 prósent. Bandaríski Seðlabankinn lækkaði vexti skart síðustu fjögur ár til þess að koma í veg fyrir efnahagskreppu í kjölfar þess að netbólan sprakk skömmu eftir aldamótin. Vextir voru svo hækkaðir í júní á þessu ári og höfðu þá ekki verið hækkaðir í fjögur ár. Búist er við að vextir í Bandaríkjunum hækki áfram á næstu misserum en að farið verði hægt í þær hækkanir. Ekki bólar á verðbólgu í Bandaríkjunum þrátt fyrir hærra verð á olíu.