Búist við samdrætti

Breska matvælaframleiðslufyrirtækið Geest birtir uppgjör sitt í dag. Bakkavör á yfir 20 prósent í félaginu og er það fært sem hlutdeildarfélag í bókum Bakkavarar. Búist er við samdrætti milli ára hjá Geest en greining KB banka telur að afkoma breska félagsins hafi lítil áhrif á afkomu Bakkavarar. Greiningaraðilar breska markaðarins gera að meðaltali ráð fyrir um fimmtán prósenta samdrætti í rekstri Geest. Frá því að afkomuviðvörun var gefin út um samdrátt hafa bréf Geest lækkað um átta prósent. Sú skoðun er ríkjandi að Bakkavör hyggi á yfirtöku Geest. Sé sú raunin má búast við að eigendur Bakkavarar gráti þurrum tárum ef afkoman leiðir til lækkandi gengis bréfa Geest.