Reynir yfirtöku í Kredittbankanum

Íslandsbanki gerði í dag formlegt tilboð í öll hlutabréf norska Kredittbankans á genginu 7,25. Það er 37 prósentum yfir meðalgengi síðustu þriggja mánaða. Stjórn Kredittbankans, starfsmenn og margir hluthafar hafa lýst ánægju með boðaða yfirtöku Íslandsbanka og má ætla að kaupin gangi eftir en þau eru bundin því skilyrði að Íslandsbanki eignist að minnsta kosti níutíu prósent bréfanna. Viðskiptin nema tæpum þremur og hálfum milljarði króna. Íslandsbanki á nú þegar um tíu prósent í Kredittbankanum og hefur fengið fyrirfram samþykki fyrir kaupum á rúmum þrjátíu prósentum í viðbót. Tilboðstímabilið verður frá 13. september til 1. október.