Ný íbúðalán munu hækka verðbólgu

Fjármálaráðuneytið segir ný íbúðalán kalla á endurskoðun verðbólguspár. Bolli Þór Bollason, forstöðumaður efnahagsskrifstofu fjármálaráðuneytisins, segir að í nýrri spá sem kynnt verður um mánaðamótin verði líklega gert ráð fyrir 0,25 prósenta hærri spá en í spá ráðuneytisins í maí. Samkvæmt því yrði verðbólga næsta árs 3,5 prósent og 3,25 prósent á árinu 2006. Bolli segir að erfitt sé að meta hver áhrif íbúðalánanna verði. "Það sem okkur sýnist er að þetta muni hafa töluverð áhrif og þar með slá út í verðbólguspá okkar." Hann býst við að áhrifin birtist meðal annars í hækkun á fasteignamarkaði, sérstaklega á stærri eignum. Bolli segir að fjármálaráðuneytið taki undir með hagspekingum markaðarins um að mikilvægt sé að aðhald verði í opinberum rekstri. Íslendingar hafa ekki áður staðið frammi fyrir endurfjármögnun húsnæðislána eins og þekkt er í nágrannalöndum. Bolli segir að þekkt sé til dæmis í Danmörku að slíkar endurfjármagnanir hafi farið af krafti í einkaneysluna. "Hvað gera þá Íslendingar sem kalla ekki allt ömmu sína í þeim efnum?"