Decode tekur dýfu

Gengi deCode hefur lækkað skarpt á síðustu dögum á Nasdaq-markaðnum í Bandaríkjunum. Gengi bréfa í félaginu fóru niður í 6,65 Bandaríkjadali á hlut á miðvikudag. Hæst fóru bréfin í 13,8 dali í febrúar. Ávöxtun fjárfesta á síðustu tólf mánuðum er samt sem áður mjög góð. Fyrir ári var gengi bréfa í félaginu um þrír dalir. Már Wolfgang Mixa, forstöðumaður SPH Verðbréfa, segir að lækkunina nú megi rekja til þess að lítið hafi verið um fréttir frá félaginu á síðustu vikum. Hann segir að félag á borð við deCode sé metið út frá fréttum fremur en afkomutölum og að enn sé mikil áhætta fólgin í fjárfestingu í félaginu þótt félagið hafi náð mikilvægum samningum. "Það er ennþá gert ráð fyrir tapi á þessu ári og það segir manni að þetta er ennþá áhættufyrirtæki og óvissa um að það nái einhvern tímann að verða rekið með hagnaði. Bréf slíkra fyrirtækja hækka og lækka í virði miðað við það hvort það séu nýjar fréttir af því," segir Már. "Það verður að hafa í huga að það er ekki langt síðan bréf í félaginu voru á genginu tveimur. Sá sem keypti í ágúst eða september í fyrra er ennþá í fantalega góðum gróða þannig að það þarf ekkert að koma á óvart að þetta hafi gefið eitthvað til baka," segir hann.