Strangar reglur LSH

"Við viljum reyna að hafa þetta allt uppi á borðinu, það er öllum til góðs, líka kynnunum," sagði Jóhannes Gunnarsson hjúkrunarforstjóri Landspítala háskólasjúkrahúss um nýjar reglur LSH um boðsferðir og vöru,- þjónustu- og lyfjakynningar. "Þetta er til að ekki sé verið að tortryggja þetta meira heldur en ástæða er til," bætti hann við. Reglurnar taka meðal annars til boðsferða starfsmanna LSH á vegum erlendra fyrirtækja. Slík boð verður að senda skriflega til sviðstjóra innkaupa- og vörustjórnunarsviðs sem tekur ákvörðun, í samráði við viðkomandi fagyfirmann, um hvort og þá hvaða starfsmaður muni fara í viðkomandi ferð. Sviðsstjóri innkaupa- og vörustjórnunarsviðs skal senda framkvæmdastjóra fjárreiðna og upplýsinga, upplýsingar um ferðina og þátttakendur í henni og ákveði sviðsstjóri að fara sjálfur í slíka kynningarferð skal tilkynning þar að lútandi send framkvæmdastjóra skrifstofu fjárreiðna og upplýsinga áður en ferð er farin. Framkvæmdastjóri fjárreiðna og upplýsinga skal halda skrá yfir ferðirnar og þátttakendur. "Slíkar kynningarferðir fela ekki í sér neinar skuldbindingar af hendi LSH um neins konar frekari viðskipti og í tengslum við ferðir er starfsmanni óheimilt að gera ráðstafanir sem skuldbundið geta spítalann," segir í reglunum. Þá taka reglurnar til kynninga innan og utan spítalans. Þar skal hafa samráð við sviðsstjóra á innkaupa- og vörustjórnunarsviði. Þá þarf að afla heimildar yfirmanns á viðkomandi sviði eða deild. Kynnar þurfa að fara eftir ákveðnum reglum. Þeir mega afhenda á kynningarfundi gjöf sem hefur táknræna merkingu fyrir viðkomandi kynningu eða er í tengslum við starf viðkomandi starfsmanns. Að öðru leyti er óheimilt að bjóða starfsmönnum gjafir eða ívilnanir í tengslum við slíkar kynningar eða í því augnamiði að hvetja starfsmenn til að beita sér fyrir innkaupum viðkomandi vöru til stofnunarinnar. Starfsmönnum er óheimilt að þiggja slík boð. Jóhannes sagði, að ef starfsmaður yrði uppvís að ítrekuðum brotum á þessum reglum yrði farið með það eins og hvert annað starfsmannamál.