Wyclef vill bjarga heimalandinu

Tónlistarmaðurinn Wyclef Jean er í mikilli herferð um þessar mundir til að bjarga heimalandi sínu, Haítí, undan fátækt og hungursneyð. Vill hann laða erlenda fjárfesta að landinu og fá þá til að stofna þar fyrirtæki. Ferðamannastraumur til Haítí hefur verið lítill undanfarin ár vegna mikilla átaka þar í landi og fyrir vikið hafa fjárfestar haldið sig í öruggri fjarlægð. Wyclef, sem er fyrrum liðsmaður Fugees, vill breyta þessu og ætlar að verða óopinber sendiherra landsins. "Ég ætla að efna til svokallaðs matarhlaups á Haítí. Ég ætla að fara þangað og koma með mat til fólksins. Ég ætla líka að fá Rauða krossinn til að starfa með mér," sagði hann. "Síðan ætla ég að vinna að friðarsamningi. Ég ætla að fara þangað og tala við alla aðila og fá þá til að leggja niður vopnin. Loks ætla ég að efla ferðamanastrauminn til landsins. Fólk fer ekki til Haítí, einfaldlega vegna þess að því finnst það algjört brjálæði." Wyclef segist ætla að bæta öryggi landsins svo að fólk komi í heimsókn, fari í sólbað og eyði fullt af peningum.