Óvissa háir útveginum

Óvissa um pólitísk afdrif kvótakerfisins eru meðal ástæðna þess að sjávarútvegsfyrirtækjum í Kauphöll Íslands hefur fækkað hratt á síðustu árum. Þetta segja sérfræðingar sem ávörpuðu ráðstefnu Kauphallarinnar í gær. Sjávarútvegsráðherra taldi hins vegar að nú væri kominn á góður friður um kerfið og nefndi því til stuðnings að búið væri að kjósa fimm sinnum til Alþingis frá því kvótakerfið var tekið upp. Á fundinum fjölluðu ýmsir sérfræðingar um íslensk sjávarútvegsfyrirtæki en kveikja umræðunnar er skýrsla eftir Prófessor Friðrik Má Baldursson og Stefán B. Gunnlaugsson. Í skýrslunni segir að lítil velta með hlutabréf í sjávarútvegsfyrirtækjum, lág ávöxtun, takmarkaðir vaxtarmöguleikar og pólitískir óvissuþættir hafi valdið áhugaleysi fjárfesta á hlutabréfum í sjávarútvegsfyrirtækjum. Þá kom fram að lágar arðgreiðslur, miklar fjárfestingar og óvissa í rekstri drægju úr eftirsókn eftir bréfum sjávarútvegsfyrirtækja enda séu háar arðgreiðslur og stöðugur rekstur jafnan talin mikilvæg fyrirtækjum sem ekki geta boðið hluthöfum upp á öran vöxt.