Erlendur stýrir Meiði

Erlendur Hjaltason hefur tekið við starfi forstjóra Meiðs ehf. Meiður er fjárfestingarfélag sem er meðal annars stærsti hluthafinn í KB banka, Medcare-Flögu og Bakkavör Group. Eignarhlutur Meiðs í KB banka er metinn á ríflega fjörtíu milljarða króna. Hagnaður Meiðs í ár mun vafalaust slá einhver met enda hefur verðmæti helstu fjárfestinga vaxið hratt í ár. Heildareignir félagsins eru um sjötíu milljarðar króna og hyggur félagið á frekari fjárfestingar bæði innanlands og í útlöndum. Lýður Guðmundsson, stjórnarformaður Meiðs, segir að stefna félagsins sé að eignast stóran hlut í félögum og vera kjölfestufjárfestir. "Við skoðum allt áhugavert sem upp kemur. Meiður er að vinna í nokkrum verkefnum erlendis," segir Lýður. Hann vill þó ekki tjá sig nánar um hvað sé í farvatninu hjá félaginu. Erlendur starfaði hjá Eimskip í um sautján ár, meðal annars sem framkvæmdastjóri félagsins. Hann segir að til standi að reka fjögurra manna skrifstofu. "Þetta eru fjárfestingar í ýmsum tækifærum og mjög áhugaverð staða sem er í þessu félagi," segir Erlendur um reksturinn. Hann segir að Meiður skoði fjárfestingartækifæri bæði hér á landi og í útöndum, einkum í Evrópu og Bandaríkjunum. Hann segir félagið búa yfir miklum styrk og því séu spennandi færi framundan.