Markaður með stofnfé

Frá og með deginum í dag geta stofnfjáreigendur í Sparisjóði Reykjavíkur og nágrennis (SPRON) selt bréf sín á sérstökum markaði. Aðalfundur SPRON samþykkti í lok mars að kanna grundvöll fyrir starfsemi slíks markaðar. Nú hefur stjórnin samið við H.F. Verðbréf hf. um skráningu kaup- og sölutilboða með stofnfé og koma á samningum milli kaupenda og seljenda. Í frétt frá stjórn SPRON kemur fram með þessu sé vonast til að eðlileg verðmyndun eigi sér stað með bréfin. Um stofnfé gilda töluvert aðrar reglur en um hlutafé. Öll viðskipti með stofnfé eru háð samþykki stjórnar SPRON auk þess sem enginn aðili getur í krafti stofnfjáreignar sinnar ráðið meira en fimm prósentum atkvæða á fundum stofnfjáreigenda. "Þetta er nokkuð flókinn ferill. Hins vegar teljum við að þarna sé kominn grundvöllur fyrir viðskipti með stofnfé og þá mun áhugi manna, bæði kaupenda og seljenda, ráða verðinu," segir Guðmundur Hauksson sparissjóðsstjóri. Stjórn SPRON hefur ekki heimild til að greiða hærra verð en uppreiknað nafnverð fyrir hluti. Með stofnun markaðarins er því verið að gefa stofnfjáreigendum færi á því að eiga viðskipti með bréf sín á yfirverði.