Vilja meiri heimildir

Þrátt fyrir að hlutur Íbúðalánasjóðs í útlánum vegna íbúðakaupa hafi minnkað í september er þessi mánuður samt einn stærsti í sögu sjóðsins. Aðeins einu sinni áður, í fyrra, voru útlán meiri í septembermánuði. Hallur Magnússon hjá Íbúðalánasjóði segir að ef ekki hefðu komið til ný lán bankanna þá hefði árið að líkindum orðið metár hjá Íbúðalánasjóði. "Eðlilega hafa sértilboð bankanna þau áhrif að markaðshlutdeild Íbúðalánasjóðs í september minnkar. Annað væri óeðlilegt og það er í sjálfu sér jákvætt að bankarnir séu að koma inn á þennan markað," segir hann. Að mati Halls liggur á því að Íbúðalánasjóður fái heimild til að hækka hámarsklán sín en hingað til hefur slík heimild ekki fengist. "Stjórn Íbúðalánasjóðs hefur lengi lagt áherslu á það. Um síðustu áramót og svo um mitt ár óskaði stjórnin eftir því til þess að geta sinnt því hlutverki sem sjóðurinn á að sinna," segir hann. Miðað við núverandi reglur duga lán íbúðalánsjóðs ekki ein og sér til kaupa á stórum og meðalstórum eignum.