Stórsamningur um fjarskipti

Kenneth Peterson hefur fyrir hönd fyrirtækis síns, Columbia Ventures, undirritað samning við Industria, íslenskt fyrirtæki, um uppbyggingu á stafrænu fjarskiptakerfi á Írlandi. Guðjón Már Guðjónsson er framkvæmdastjóri Industria. Á blaðamannafundi í gær sagði hann að um væri að ræða stærsta samning sem íslenskt fyrirtæki á sviði fjarskipta hafi gert um útflutning á hugviti. Um er að ræða uppbyggingu á stafrænu sjónvarps-, síma og breiðbandskerfi í einum bæ á Írlandi. Þar verða öll heimili tengd við kerfið og stendur til að nýta reynslu þess verkefnis til frekari uppbyggingar á Írlandi og anannars staðar. "Industria býr yfir mikilli sérþekkingu á þessu sviði og hefur ekki aðeins þróað hug- og vélbúnað heldur einnig hugmyndafræðina á bak við hvernig nýta megi þessa fjarskiptatækni," segir Kenneth Peterson. Peterson segir að umfang samningsins muni ráðast af því hversu vel takist til á Írlandi. "Á sex næstu mánuðum komumst við að því hvernig fólk tekur þessu. Ég er mjög vongóður um að þetta verði stórt verkefni," segir hann. "Ég get því ekki sagt til um hve háar upphæðir um ræðir en þetta er verkefni upp á margar milljónir Bandaríkjadala," bætir hann við. Guðjón Már segir að fyrstu heimilin verði tengd við fjarskiptanetið í byrjun desember.