Tap á rekstri Morgunblaðsins

Tap Árvakurs, útgefanda Morgunblaðsins, nam 303 milljónum króna á síðasta ári samanborið við tæplega 50 milljóna króna hagnað árið áður, samkvæmt endurskoðuðum ársreikningi félagsins fyrir árið 2003. Tap fyrir afskriftir og fjármagnsliði nam 217 milljónum króna, sem er 450 milljónum króna lakari afkoma en árið áður. Eignir Árvakurs jukust hins vegar um ríflega 1,1 milljarð. Eignaaukningin kemur til vegna fjárfestingar í nýrri prentsmiðju, svo og vegna endurmats á fasteignum félagsins sem hækkaði bókfært verð þeirra um hálfan milljarð. Eigið fé nemur rúmum milljarði króna. Árvakur hefur fjárfest í nýrri prentsmiðju og nemur lánasamningur vegna hennar 2,6 milljörðum króna. Vaxtagreiðslna vegna lánsins mun sjá stað í komandi uppgjörum félagsins. Rekstrargjöld hækka um rúmar 300 milljónir milli áranna 2002 og 2003, en rekstartekjur dragast saman um 90 milljónir. Launakostnaður jókst um 154 milljónir króna milli ára. Handbært fé lækkar um 170 milljónir og nam í árslok 2003 tæpum 48 milljónum króna.