Meiri merki bólu

Hlutabréfamarkaðurinn ber meiri merki verðbólu en áður að mati Greiningardeildar Íslandsbanka. Greiningardeildin birti afkomuspá í gær. Sérfræðingar hennar telja ekki hægt að fullyrða að verðbóla sé á markaðnum en meta það svo að áhættan af skráðum bréfum sé meiri nú en áður. Markaðurinn sýni sífellt sterkari merki spákaupmennsku. Þrátt fyrir þetta spáir greiningardeildin að hlutabréf muni halda áfram að hækka og að Úrvalsvísitalan muni hækka um fimmtán prósent á næstu sex mánuðum. Mikil bjartsýni hefur einkennt markaðinn og hækkaði úrvalsvísitalan um 28 prósent á þriðja ársfjórðungi. Bjartsýnin mun því halda áfram að mati Íslandsbanka. Það sem drífur bjartsýnina áfram eru væntingar um frekari útrás skráðra fyrirtækja, auk þess sem búsist er við frekari umbreytingu á innlendum fjármálamarkaði. Greining segir marga búast við breyttu landslagi á fjármálamarkaði á næstunni. "Kenningarnar eru margar, fer fjölgandi og kynda allar undir verði fjármálafyrirtækjanna," segir í afkomuskýrslu Greiningardeilda Íslandsbanka. Í afkomuspánni er gert ráð fyrir að markaðurinn leiðréttir sig á seinni hluta tímabilsins næstu tólf mánuði og hækkun Úrvalsvísitölunnar verði tíu prósent þegar tímabilið verði gert upp í heild.