Bakkavör að yfirtaka Geest

Bakkavör hefur eignast yfir 20 prósenta hlut í breska matvörufyrirtækinu Geest. Þar með er Geest orðið hlutdeildarfélag Bakkavarar og kemur sem slíkt fram í reikningum félagsins. Bakkavör hefur einnig stækkað skuldabréfaflokk um 2,5 milljarða. "Tilgangur okkar er að nýta fjármögnunina til frekari uppbyggingar," segir Lýður Guðmundsson, forstjóri Bakkavarar. Hann vill ekki tjá sig frekar um hver þau verkefni séu. Bakkavör má ekki gera yfirtökutilboð í Geest fyrr en í byrjun desember. Nýja lánið mun auðvelda frármögnun yfirtökunnar. Geest er fjárhagslega sterkt félag og myndi slíkt hjálpa Bakkavör við yfirtökuna með þeim hætti að hægt væri að skuldsetja Geest frekar við kaupin. Þannig væri þörf Bakkavarar til þess að sækja sér nýtt hlutafé á markað óveruleg verði ráðist í yfirtöku, þrátt fyrir að Geest sé stærra fyrirtæki en Bakkavör. Með sameiningu myndi fjölbreytni framleiðsluvara aukast, auk þess sem viðskiptamannahópur stækkar og áhættan dreifist. Stórmarkaðakeðjan Tesco er langstærsti viðskiptavinur Bakkavarar.