Ekkert varð af fundi

Ekkert varð af fyrirhuguðum hluthafafundi hjá Opnum kerfum í gær. Kögun, stærsti hluthafinn, fór fram á fundinn fyrir tæpum mánuði síðan en féll frá kröfunni í gær. Í tilkynningu frá Kögun segir að félagið telji að flokkadrættir í hluthafahópi Opinna kerfa séu ekki til hagsbóta. Útlit var fyrir að barátta yrði milli Kögunar og Frosta Bergssonar, stjórnarformanns og stofnanda Opinna kerfa, um meirihluta í stjórninni. Fulltrúar fylkinganna tveggja munu reyna að jafna ágreining sinn í stað þess að efna til kosningar. Kögun á 35,77 prósent í félaginu og Frosti tæplega sautján prósent. Gunnlaugur M. Sigmundsson, forstjóri Kögunar, segist telja að tillaga hans hefði náð fram að ganga en ljóst hafi verið að erfitt væri að knýja fram breytingar í félaginu ef mikil fyrirstaða yrði innan stjórnarinnar. Því hafi Kögun ákveðið að draga tillögu sína til baka. "Það væri því miklu betra að reyna að ná saman um stjórn heldur en að reyna að ná saman inni í stjórn eftir að það væri búið að fara í gegnum slíka kosningu," segir hann. Hann telur að hugsanlega komi til kosningar um stefnu í félaginu síðar en að með þessari aðgerð hafi Kögun viljað skapa svigrúm til áframhaldandi viðræðna. Frosti Bergsson segir ljóst að ef farið hefði verið út í kosningu í stjórn hefði hún orðið mjög tvísýn. "Ég vona bara að menn nái samkomulagi sem taki mið af hagsmunum allra hluthafa og starfsmann og viðskiptavina félagsins," segir Frosti.