Ný tegund gervifótar

Stoðtækjafyrirtækið Össur kynnti í vikunni að nú væru komnir í prófanir rafknúnir gervifætur gæddir gervigreind. Þetta er nýjung á sviði stoðtækjaframleiðslu sem Össur stendur að í samstarfi við bandaríska fyrirtækið Victhom Human Bionics. "Það sem um er að ræða er áframhald á þessari þróun sem við höfum unnið að varðandi gervigreind og tölvustýrt hné. Í samvinnu við þetta félag höfum við sett mótor í gervilöppina og það er algjör nýjung," segir Jón Sigurðsson, forstjóri Össurar. Hann segir að markaðssetning vörunnar hefjist á næsta ári en nokkur tími líði þar til sala komist á fullt skrið. "Markaðssetning mun hefjast á næsta ári. Hins vegar tekur þessi markaðssetning mörg ár og við förum ekki að sjá neinar alvöru-sölutölur á næstu árum. Nú þurfum við að hefja klínískar rannsóknir og koma þessu inn í endurgreiðslukerfi. Það er mikið þolinmæðisverk," segir Jón Sigurðsson.