Straumur fram úr væntingum

Fjárfestingarbankinn Straumur skilaði níu mánaða uppgjöri í gær. Hagnaður fyrirtækisins á þriðja ársfjórðungi nam 3.141 milljónum króna. Þetta er nokkuð umfram þær væntingar sem greiningardeildir bankanna höfðu. Það sem af er ári hefur Straumur skilað 6,3 milljarða króna hagnaði. Þórður Már Jóhannesson, forstjóri Straums, er mjög ánægður með uppgjörið. "Það hefur tekist á fyrstu níu mánuðum ársins að breikka tekjugrunninn sem bankinn starfar á," segir hann. Hann segir að Straumur hafi búið við töluverðan gengishagnað, eins og aðrar fjármálastofnanir, vegna góðs gengis á hlutabréfamörkuðum. Hann segir að aðrir tekjustofnar hafi verið efldir og verði byggðir upp enn frekar á næstunni. "Ég er því algjörlega ósmeykur um framtíðina," segir Þórður. Hann segir að rekstur fjárfestingarbanka sé að nokkru leyti frábrugðinn rekstri viðskiptabanka. "Afkoman byggist að nokkru leyti á óreglulegum tekjum, eins og í samrunum og yfitökum fyrirtækja, en ekki á hefðbundnum útlánatekjum," segir hann. Þórður segir að verkefnastaða fyrirtækisins sé betri nú en nokkru sinni fyrr. Hagnaður Straums er umfram væntingar allra greiningardeilda. Íslandsbanki hafði spá félaginu 3.117 milljón króna hagnaði, KB banki spáði 3.105 milljónum og Landsbankinn 2.945.