Dregur til tíðinda hjá Baugi

Allar líkur eru á því að Baugur leggi fram yfirtökutilboð í Big Food Group í dag og bjóði 95 pens á hlut. Miðað við það er markaðsvirði BFG ríflega 40 milljarðar króna eða 326 milljónir punda.. Endurfjármagna þarf allar skuldir félagsins og við það bætast 42 milljarðar króna. Við þetta bætist svo fjármögnun á rekstrarfé og birgðum til lengri tíma. Alls þarf því að semja um 110 milljarða fjármögnun í tengslum við kaupin eða því sem nemur fjárfestingu Íslendinga í Kárahnjúkavirkjun. Big Food má muna sinn fífil fegurri. Gengi bréfa félagsins hefur fallið frá árinu 2001 úr 320 pensum á hlut. Gengi félagsins stóð í 24 pensum þegar Baugur keypti 15 prósenta hlut í félaginu. Big Food keypti Booker verslanirnar árið 2000 á 326 milljón pund sem er sama upphæð og væntanlegt tilboð Baugs fyrir allt fyrirtækið hljóðar upp á nú. Rekstur Iceland verslananna hefur gengið brösuglega eftir að stofnandi þeirra, Malcolm Walker, hraktist þaðan í kjölfar ásakana um innherjasvik. Hann var sýknaður af þeim áburði og mun koma að rekstri Iceland verði af kaupum Baugs. Ekki munu þó vera áform um að hann kaupi Iceland af Big Food Group.