Coxon líkar einveran vel

Graham Coxon, fyrrverandi gítarleikari Blur, segist ákaflega ánægður með að vera einn síns liðs. Damon Albarn og fyrrverandi félagar hans í Blur hafa undanfarið unnið að nýrri plötu og nýlega lýsti Albarn því yfir að Coxon yrði ávallt gítarleikari hljómsveitarinnar. Coxon virðist þó ekki vera á sama máli og á ekki von á að starfa með hljómsveitinni á næstunni. "Hver veit ... kannski eftir tuttugu ár? sagði hann í nýlegu viðtali. "Ég hef engan áhuga á því núna. Ég hef margt á minni könnu. Ég veit að fólk vill tala um þetta en það er orðið langt síðan ég hætti, eða tvö ár. Þegar ég hætti breyttist líf mitt á ýmsan hátt og þessa stundina hef ég mjög gaman af því að spila einn." Nýjasta sólóplata Coxons heitir Happiness in Magazines og kom hún út í síðasta mánuði.