Ulrich rokkaði yfir sig

Lars Ulrich, trommari væntanlegra Íslandsvina í Metallicu, er sestur aftur á bak við settið eftir veikindi og spilaði meðal annars á tónleikum sveitarinnar í Þýskalandi síðastliðinn þriðjudag. Ulrich segir að of mikið rokk og ról hafi valdið veikindum sínum. Urðu þau til þess að hann missti af tónleikum sveitarinnar í Bretlandi og dvaldi þess í stað á sjúkrahúsi í Þýskalandi. Þeir Joey Jordison, trommuleikari Slipknot, Dave Lombardo, trommari Slayer, og Flemming Larsen, tæknilegur aðstoðarmaður Ulrichs, hlupu í skarðið fyrir hann á tónleikunum. Í yfirlýsingu á heimasíðu Metallicu segist Ulrich hafa verið undir miklu álagi undanfarna mánuði og það hafi komi niður á heilsu hans. "Eftir að hafa rokkað grimmt síðustu sex mánuði víðs vegar um heiminn held ég að aldur minn hafi farið að segja dálítið til sín," sagði Ulrich. Um aðstoðartrommuleikara sína hafði hann þetta að segja: "Ég vildi óska að ég hefði séð tónleikana. Eða kannski var bara best að ég gerði það ekki."