Rock star í undirbúningi

Mark Burnett, höfundur raunveruleikaþáttanna vinsælu Survivor og The Apprentice, er að undirbúa nýjan þátt sem kallast Rock Star. Þar keppa þátttakendur um að fá að syngja með frægri rokkhljómsveit og fara með henni í heimsreisu. "Mér finnst vera pláss fyrir meira en einn stóran hæfileikaþátt í sjónvarpinu," sagði Burnett. "Rokktónlist hefur hingað til orðið algjörlega útundan." Að sögn Burnett fá áhorfendur þáttarins að kynnast þátttakendunum mun betur en í American Idol. Jafnframt mun atkvæðagreiðsla almennings ekki ráða ein og sér hver sigurvegarinn verður. Hljómsveitin sem sigurvegarinn mun syngja með mun hafa sitt að segja auk þess sem leitað verður til sjálfstæðs dómara. Ekki hefur verið gefið upp hvaða hljómsveit mun koma fram í þættinum.